~~~~ БОРОО ~!~~~

Танил гудамжинд бороо орно
Татсан тамхины иш урсана
Энэ цаг мөч эргэж ирэхгүй урсана
Эргээд олдохгүй шүлгийн мөрүүд урсана

Хүүхэд нас хажуугаар нуугдан гүйгээд
Хачин танил нүднээс хуучин нулимас урсана
Хэзээ ч юм үзсэн амьдрал урсаж
Хэлээгүй хайр нүцгэн модны доор норно

Хатаасан шүлэг норж дуслахад
Хавар ч биш бас намар биш
Энэ зүүд биш юм байна
Энд сэтгэлд бороо орж байна